kalamon71
Admin
عدد المساهمات : 558
السٌّمعَة : 5
تاريخ التسجيل : 14/04/2009
العمر : 53
 |  موضوع: زجل المدينة الرياضية 1972 الجولة الاولى – اميل ابو شقرا – خليل شحرور  الجمعة مايو 29, 2009 8:20 pm | |
| الجولة الاولى كانت بين الشاعرين (اميل ابو شقرا – خليل شحرور)
الموضوع كان بين التحرر والتقاليد
بعض ما دار من حوار بين الشاعرين وقصيدة لكل شاعر
خليل شحرور
يا بيرق الشعر اللي مجدك ما انطوى
رفرف مع النسمات وتمايل غوى
زند اللي شالك زند مآكن ما انطوى
سلاحو عقل من منبع الحكمة ارتوى
ويا ابو شقرا قسّم حجاز ونوا
ما زال فكرك عا محاربتي نوى
لا تضلك معلق على حبال الهوى
النقوك علة ، نقوني دوا
وتا يصير قدك قدنا بالمستوى
شفتك كبير السن وزغير القوى
استقرضلك من العمر سبع ثمان سنين
وزيدن بعمر الشعر تا نمشي سوا
ابو شقرا
بالعمر او بالقد قلي انت مين
مجهول مش موجود بين الحاضرين
الحق عللي اختارك من الحاكمين
وحط الغباوه قبال سيد العارفين
بالشعر والخبرة بقوافي مدهبين
قرضنا المتل فضلك جماعة عايبين
وشو منتظر استقرض من البايعين
الكانوا على باب المضافي نايمين
عمبقرض المتحجر شعور وحنين
وعمبقرض رجال الديانة كتاب دين
وعمبقرض الرسام ريشة جانحي
وعمبقرض التاريخ تاريخ السنين
خليل شحرور
يا حضرة المديون صح النوم فيق
وجودك ما عمينفع عدو ولا صديق
عمتقرض البنزين تاطفي الحريق
وعمتقرض التقال تا تنجي الغريق
يا بريق حد البحر ما بتبل ريق
مين البيقول البحر معتاز البريق
يا جيل رجعي ، لا نمو ولا بريق
كبرتو وصرتو حجار عا طراف الطريق
خفف تقليد المعادت تليق
يا مبلبل الافكار يا رجعي عتيق
الافضل الك تعقل بهالظرف الدقيق
وان ما عقلت بضطر عن حق وحقيق
اعمل متل هتلر بختياريتو
وبحرر العالم من الطقم العتيق
اميل ابو شقرا
كبرت وعاركت الدهر من كل البواب
ومن صفنة التفكير شعر الراس شاب
وما بعتقد زي التحرر بالتياب
من ميل حررت الدني من الانتداب
ولا متل هالطقم العتيق الرب جاب
ومن ميل ما بتمضي سني بلا انقلاب
وكل عمري ريسك يا ابو الحباب
تحررت من عهدي ومت الابطال خاب
قديش بدك بعد تامتلي تصير
شيخ الشباب وريس حكومة شباب
| |
|
kalamon71
Admin
عدد المساهمات : 558
السٌّمعَة : 5
تاريخ التسجيل : 14/04/2009
العمر : 53
| | موضوع: رد: زجل المدينة الرياضية 1972 الجولة الاولى – اميل ابو شقرا – خليل شحرور الجمعة مايو 29, 2009 8:22 pm | |
| الجولة الثانية كانت بين الشاعرين (اسعد سعيد- وطليع حمدان)
الموضوع كان بين الربيع والخريف
بعض ما دار من حوار بين الشاعرين وقصيدة لكل شاعر
طليع حمدان
تبسم يا اسعد بسمة الطفل الرضيع
قدام شاعر قد هالكون الوسيع
انكنك بحر عا منبري بدك تضيع
وما في ولا اسعد بيسعد مع طليع
وبين الخريف وبين نيسان البديع
ما بخيرك وحياة عينين الجميع
انصارنا الاحرار هني بيعرفو
مين الخريف الاصفر ومين الربيع
اسعد سعيد
يا لجنة التحكيم منبرنا شجون
انتو فرّقو مين اللي بيرجح عيون
وفجّر يا ليل الشعر من قلبك عيون
مجد الزجل والحرف والانصار صون
اتكلمت يا حمدان واستحلى السكون
يحطك كحل بعيون ما الها جفون
عرفتك ربيع فريخ بسنين الفنون
ونعنوع ما بتقدر على حالك تمون
لا انت قاس ولا انا قلبي حنون
والعقل مش سعد السعادي للجنون
ولو ماضاع بحري فيك بتشك العيون
وبتحوم عا زهورك فراشات الظنون
وشو همني بدك ربيع تكون كون
قبالو الألو عليك وعا بستانك ديون
اتركني الك عنقود اصفر عالغصون
وثروي تخلي سنينك الصعبي تهون
واصرف من كروم الخريف وغلتو
وشبرق شبابك يا ربيع الزيزفون
طليع حمدان
يا ليل جبلي من الزنابق محرمي
وخدها بدمعات العيون محممي
ويا حضرة العنقود حَبْك ما نمي
بأذار لولا ما سقيتك من دمي
اتركني ربيع وطفل زايد مبسمي
وتدهدك النسمي وعا خدي ترتمي
وما بمون عا حالي ما بدا ترجمي
قلبي مِلك انصار فيي مغرمي
وانت يا بقوة جنينة مفّطمي
اصتزغر خريفك حد شهر المريمي
روحي بعبير الزيزفون مطعمي
لكن بيعطي غير موسم موسمي
وجودي ربيع الحصرم بعين الحسود
وجايي تا افقر بعينك حصرمي
اسعد سعيد
الوطّا السما وحطك قبال اسعد سعيد
دلك على الحر اللي ما بيحسد عبيد
فَقْرَك بعين الشمس حصرم عن بعيد
مش فَقرْ حصرم فُقر عقل وقصر ايد
وجنينة اللي مفطمي وحكيك أكيد
بعلمي الربيع زهور وطيور ونشيد
من خيرها فطمتك ولبستك جديد
طالع ربيعك متل دفن بيوم عيد
ومن فكرك الاعجر حمل موسم وحيد
حصرم عجز سعرو متل شعرك زهيد
ويا مفكر الحصرم لغة حاجي تعيد
وتزعج نبيد الفكر بخوابي القصيد
وحتى ما تضرس فيك ويضيع الرصيد
وتزهر وتعقد بدل ما نقصك يزيد
تعلم لغة جديدي يا حصرم واستحي
وافهم شو عمتحكي مع خوابي النبيد
| |
|
